Kapanewon Ngemplak Mengeti 106 taun Kabupaten Sleman

Minggu Legi, surya kaping 15 Mei 2022 wanci tabuh 08.00 wonten ing Kapanewon Ngemplak katindakaken upacara pengetan ridumadosipun Kabupaten Sleman jangkep kaping satus enem. Para rawuh kakung saha putri punggawa praja Kapanewon Ngemplak ngangge busana mataraman jangkep.

Panewu Ngemplak, Sumariyah, S.Sos., M.Si minangka Pangageng Upacara maosaken sabdatama Bupati Sleman ingkang ngemutaken malih babagan sesanti “Sleman Gumregah, Sesarengan mbangun Sleman”. Pengetan ridumadosipun Kabupaten Sleman ingkang jangkep kaping satus enem menika minangka srana ingkang mligi kanggenipun para punggawa praja lan sedaya warga Kabupaten Sleman supados tansah nuwuhaken raos greget lan semangat ngalajengaken kridhaning pembangunan wonten ing Kabupaten Sleman.

Panewu Anom Ngemplak, Tri Widodo Purnomo, S.Sos ugi ngaturaken pamuji dhumateng Gusti bilih wonten ing pengetan menika Kapanewon Ngemplak saged ngawontenaken upacara kados adatipun kanthi prokes ingkang sae. “Berkahipun Gusti ingkang Maha Asih ugi para warga masyarakat ingkang sampun kersa nindakaken protokol kesehatan Covid-19 wonten ing gesang paditenan. Awit saking menika, wonten ing kalodhangan menika kula lan panjenengan sedaya saged kempal ngawontenaken upacara wonten ing papan menika.” (Ayushinta)